Në prag të shënimit të Ditës Ndërkombëtarëve të të Zhdukurve, ka dalë nga shtypi, antologjia poetike me titull “Dhembje që vret” e përgatitur nga autorja Mevlyde Mezini Saraçi.

E përbashkëta e tyre është se të gjitha poezitë në këtë antologji i janë dedikuar personave të zhdukur nga kriminelët serbë në luftën e fundit në Kosovë.

Lidhur me botimin e kësaj antologjie Saraqi, ka thënë se përzgjedhjes së poezive i ka paraprirë konkursi përkatës i botuar nga Qendra Kombëtare e Poetëve, Shkrimtarëve dhe Artistëve “Gjakova” , ndërkohë që më pastaj janë përzgjedhur 58 poezi.

Duke i falënderuar dhe duke ju shprehur mirënjohje të thellë për bashkëpunim në realizmin e kësaj antologjie, autorja Saraqi, tha se “poetët të cilët kanë shkrirë shpirtin poetik me dhembje e krenari, në këtë mënyrë kanë ndërtuar një kështjellë historike dhe të qëndrueshme me vargjet e tyre”.

E veçanta e botimit të 100 ekzemplarëve të antologjisë poetike me titull “Dhembje që vret” e përgatitur nga Mevlyde Mezini Saraçi e redaktor Muhamet Rogova është se libri është botuar në mënyrë vullnetare , ndërkohë që Saraqi ka bërë thirrje tek donatorët që të mbështesin edhe botimin e ekzemplarëve tjerë, në mënyrë që çdo familje e të pagjeturve në Kosovë, të pajiset me një antologji të tillë./radiogjakova/